د ا.ا.ا د عامې روغتیا وزیر، ښاغلي مولوي نور جلال جلالي د اسلامي همکاریو سازمان (OIC) سفیر ښاغلي العیاش سره په خپل کاري دفتر کې لیدنه تر سره کړه
په دې لیدنه کې د روغتیا په برخه کې د اړیکو په پیاوړتیا ، همدارنګه د ملک سلمان د بشري مرستو او همکارۍ مرکز (KSRelief) لخوا د افغانستان د روغتیایي سکټور د ملاتړ او په افغانستان کې د راتلونکو روغتیايي پروګرامونو په اړه معلومات تبادله شول.
ښاغلي وزیر، د اسلامي همکاریو سازمان رول په اسلامي نړۍ کې ارزښتناکه وباله او زیاته یې کړه، د اسلامي همکارۍ سازمان باید د روغتیا په برخه کې د افغان ولس پیغام او اړتیا له نړۍ سره شریکه کړي.
د عامې روغتیا وزیر، ښاغلي مولوي نور جلال جلالي، روغتیایي خدماتو ته لاسرسی د خلکو حق وباله او ټینګار یې وکړ، چې د روغتیا برخه باید له سیاست څخه لرې وساتل شي.
ښاغلي وزیر همداراز وویل: هڅه کوي چې د نړیوالو مرستو تر څنګ د خپلې داخلي بودیجې څخه په استفادې د روغتیایي سیسټم پراختیا او معیاري کولو لپاره لا ډېر کار وکړي، چې له نېکه مرغه په دې وروستیو کې په یو شمېر سترو روغتیايي پروژو کار په چټکۍ سره روان دی.
