د ا.ا.ا د عامې روغتیا وزیر، ښاغلي مولوي نور جلال جلالي د عامې روغتیا سکتور تمویلوونکو او نړیوالو کاري شریکانو سره د همغږۍ غونډه ترسره کړه

په غونډه کې د عامې روغتیا وزارت د روغتیایي خدماتو وړاندې کولو مرستیال ښاغلي مولوي عبدالولي حقاني ، د روغتیا نړیوال سازمان، یونیسف، نړیوال بانک، ګاوي (Gavi) او نورو مرسته کوونکو مؤسسو استازو ګډون درلود، په دې مجلس کې د افغانستان د روغتیایي سکتور پر  اوسني وضعیت، د مرستو پر اهمیت او پر راتلونکو پلانونو خبرې وشوې ؛ د عامې روغتیا ښاغلي وزیر د غوره او باکیفیته خدماتو وړاندې کولو لپاره د سرچینو اغېزمن مدیریت، د شفافیت اصل ته ژمنتیا او د فساد پر وړاندې مبارزه د ټولو ګډ مسؤلیت وباله او زیاته یې کړه، چې له ۲۰۲۶ میلادي کال وروسته به د افغانستان د روغتیایي سکتور لپاره یوه واضحه او اوږد مهاله ستراتیژیکه نقشه موجوده وي، چې په هغې کې به د وزارت د تمویلوونکو رولونه روښانه او د خدماتو ادغام به د یوې جامع ارزونې وروسته په منطقي ډول ترسره شي.

همدا راز ښاغلي وزیر وویل، د نوې روغتیایي ستراتیژۍ د جوړېدو چارې روانې دي، چې د عامې روغتیا سکتور د تقویې لپاره به حیاتي ارزښت ولري چې د BPHS او EPHS خدماتو د بیا کتنې بهیر هم پیل شوی، ترڅو د لومړنیو او ثانوي روغتیایي خدماتو کیفیت لوړ، د خلکو روغتیا خوندي او اړتیاوې یې پوره شي.

بل لور د روغتیا نړیوال سازمان، یونیسف، نړیوال بانک، ګاوي (Gavi) او نورو مرسته کوونکو مؤسسو استازو وویل، چې د افغانستان د روغتیایي سکتور ملاتړ تر ۲۰۲۶ میلادي کال پورې تازه کوي او په دې موده کې به د روغتیا برخه کې د بېړنیو خدماتو (HER) پروګرام د تمویل ترڅنګ له عامې روغتیا وزارت سره نږدې او ګډ کار هم کوي.