د ااا د عامې روغتیا وزیر ښاغلي مولوي نور جلال جلالي د روغتیا نړیوال سازمان ، یونیسیف نړیوال سازمان ، بیل ګیټس بنسټ او د پولیو ناروغۍ سره د مبارزې اړوند افغانستان ته راغلي ګډ لوړ پوړي پلاوي سره مجلس تر سره کړ
په دې مجلس کې چې د روغتیایي خدماتو وړاندې کولو مرستیال ښاغلي مولوي عبدالولي حقاني، د روغتیا نړیوال سازمان حوزوي مشرې اغلې دوکتور حنان بلخي ، د یونیسف سازمان حوزوي مشر سنجی ویجیسیکرا ، د بیل ګېټس بنسټ استازو ، د یونیسیف سازمان د افغانستان لپاره مشر ډاکټر تاج الدین اویلا ، د پولیو ناروغۍ سره د مبارزې د ختیځې مدیترانې حوزې مشر ډاکټر حامد رضا جعفري او یو شمیر نورو مسؤلینو شتون درلود ، د روغتیایي خدماتو پر پراختیا ، په اړینو برخو کې د روغتیایي سیستم پر ملاتړ ، په روغتیایي خدماتو کې شفافیت ، د لمړیتوبونو پر اساس د خدماتو تر سراوي ، د ساري ناروغیو پر مخنیوي ، د پولیو ناروغۍ پر محوه کولو ، په چارو کې د ښې همغږۍ را منځته کولو ، افغان علمي کادرونو ته لمړیتوب ورکولو ، د روغتیایي او تشخیصیه کارکوونکو پر ظرفیت لوړونې او یو شمېر نورو اړینو موضوعاتو خبرې تر سره شوې.
د عامې روغتیا ښاغلي وزیر،د خپلې وینا په ترڅ کې د ذکر شویو موضوعاتو ترڅنګ ټینګار وکړ “ نړیوال ادارات باید د روغتیا نوې جوړې شوې ملي پالیسۍ سره مطابق خدمات عیار کړي او د خدماتو وړاندې کولو پر مهال دې ورته ځانګړې پاملرنه کوي”.
ښاغلي وزیر د خپلې وینا په ترڅ کې وویل، د عامې روغتيا وزارت د نورو ساري ناروغیو تر څنګ د پولیو له منځه وړلو ته هم ژمن دی، چې په دې برخه کې د واکسین ښه تطبیق او لمړنیو روغتیایي خدماتو ته لاسرسی اړین دي ، هغه د وزارت کاري شریکانو ته د پولیو واکسین د تطبیق برخه کې د همکارۍ او شته ستونزو د حل ډاډ څرګند او له هغوی یې وغوښتل “ همغږي باید لا زیاته او د چارو د لا ښه والي په موخه باید ګډ تصامیم ونیول شي”.
بل لور د روغتیا نړیوال سازمان د ختیځې مدیترانې سیمه ییزې مشرې، اغلې دوکتور حنان البلخي د پولیو ناوړه ناروغۍ د مخنیوي او له منځه وړلو لپاره د پولیو واکسین د غوره تطبیق، د روږدو ناروغانو درملنې او د روغتیایي کارکوونکو د ظرفیت لوړولو په اړه وینا او ژمنه تر سره کړه ، نوموړې همدارنګه د پولیو له منځه وړلو برخه کې د ا.ا.ا د عامې روغتیا وزارت د هڅو ستاینه وکړه.
همدا راز، د پولیو د څار بورډ مشر ډاکټر کریس الیاس وویل، زموږ د لیدنو موخه د پولیو د له منځه وړلو لپاره د اغېزمنو حل لارو پیدا کول دي او هڅه کوو، چې په دې برخه کې خدمات لا زیات، ښه او معیاري شي، تر څو د پولیو ویروس په بشپړه توګه له منځه ولاړ شي.
