د افغانستان لپاره د ناروې کمېټې په مالي ملاتړ د پوهاند غضنفر روغتیایي علومو انسټیټیوټ درې میاشتنی د عملي زده کړو پروګرام د ۱۴۰۴هـ ش کال د سنبلې میاشتې په ۱۸مه نېټه پیل شو
دغه پروګرام نارینه او ښځینه فارغانو ته په اړوندو څانګو کې د کاري مهارتونو زده کړې په موخه ځانګړی شوی، چې ښځینه فارغانې به په کې په ځانګړو روغتیایي مرکزونو کې د قابلګۍ، نرسنګ، لابراتوار، درمل جوړونې او فزیوتراپي برخو کې عملي مهارتونه زده کړي او یاد پروګرام به په بدخشان، فاریاب، غزني، کاپیسا، خوست، ننګرهار او پکتیا ولایتونو کې تطبیقېږي او له ۱۵ ولایتونو څخه به په مجموعي توګه ترې ۵۴۶ تنه فارغان ګټه واخلي، چې په کې شاوخوا ۳۰۰ د قابلګۍ، ۱۸۰ د نرسنګ، ۲۴ د درمل جوړونې، ۲۴ د لابراتوار او ۱۸ د فزیوتراپي فارغان شامل دي.
د پوهاند غضنفر روغتیایي علومو انسټیټیوټ رئیس، ډاکټر محمد قاسم عادل ګډونوالو ته ښه راغلاست ویلو ترڅنګ یاد پروګرام د فارغانو د مسلکي مهارتونو د پیاوړتیا لپاره ارزښتمند وباله او د ناروې کمېټې له مالي ملاتړ او همکارۍ څخه یې مننه وکړه.
دغه راز، د افغانستان لپاره د ناروی کمېټې د روغتیا برخې کوارډیناتور دوکتور شیرزاد د پروګرام د ارزښت په اړه وینا ترسره او زیاته یې کړه، چې تر دې مهاله یې ۵۵۶ تنه فارغانو ته د عملي زده کړو له لارې د مسلکي مهارتونو د پیاوړتیا زمینه برابره کړې ده.
