د اکمال تخصص برنامې طبي کادر متخصصینو شوری دویمه ناسته ترسره شوه
د افغانستان اسلامي امارت د عامې روغتیا وزیر، ښاغلي مولوي نور جلال جلالي په مشرۍ د اکمال تخصص برنامې طبي کادر متخصصینو شوری دویمه ناسته ترسره شوه
په دې ناسته کې د عامې روغتیا وزارت د مالي او اداري چارو مرستیال ښاغلي ملا بخت الرحمن شرافت، د اکمال تخصص برنامې استادانو، د کابل طبي پوهنتون رئیس مفتي اسدالله نجات، او د شوری طبي کادر مسلکي استازو ګډون کړی و.
د عامې روغتیا وزیر، ښاغلي مولوي نور جلال جلالي طب یو مقدس مسلک یاد کړ او په تخصصي روغتونونو کې د نویو تخصصي څانګو رامنځته کولو ټینګار سربېره یې وویل:” په هغه ولایتي تخصصي روغتونونو کې چې په اړوندو څانګو کې ټرینران موجود نه وي، ټرینر استادان دې د مرکز کابل او یا حوزوي تخصصي روغتونونو په خالي بستونو کې د ازموینو له لارې ځای پر ځای او یا دې په خدمتي ډول یادو روغتونونو ته رسمي ټرینر متخصصین معرفي شي؛ ترڅو د روزنیزو برنامو معیار لا برابر او پروګرام له ځنډ او خنډ سره مخ نه شي.
په دې ناسته کې همداراز د اکمال تخصص ریاست له لوري د ۲۸ بېلا بېلو تخصصي برخو لپاره ترتیب شوی علمي نصاب (کریکولم) او د متخصصینو د علمي رتبو په برخه کې د مراحلو طی کولو لارښود تائید او تصویب شول.
د عامې روغتیا وزیر دغه راز د استادانو د علمي رتبو ورکولو په چارو کې د چټکتیا په موخه څو فرعي کمېټې وګمارلې، چې په دې برخه کې لازم اجراءت ترسره کړي.
د یادونې وړ ده، چې د اکمال تخصص لوی ریاست د هغه استادانو لپاره، چې علمي رتبو ته د ترفیع لپاره یې قانوني اسناد او پړاوونه بشپړ کړي وي، یو ځانګړی لارښود جوړ کړی، چې له مخې به یې د علمي رتبو برخه کې د اسنادو د کتلو چارې په نږدې راتلونکي کې پیل شي.
