د تورخم اساسي روغتیايي مرکز ایمرجنسي روغتون ته ارتقاء ورکړل شوه

د تورخم اساسي روغتیايي مرکز ( BHC ) څخه ایمرجنسي روغتون ته ارتقاء ورکړل شوه:

په همدې موخه جوړو شوو مراسمو کې د عامې روغتیا وزارت د مالي او اداري چارو مرستیال، ښاغلي مولوي محمد اسحق صاحبزاده د ننګرهار والي، حاجي ملا محمد نعیم اخند، روغتیايي کارکوونکو او نورو مسئولینو ګډون کړی و.

د عامې روغتیا وزارت د مالي او اداري چارو مرستیال، مولوي محمد اسحق صاحبزاده د دې روغتون ارتقاء د سیمې د اوسېدونکو لپاره یو ستر زېری وګاڼه او ویې ویل: ( د افغانستان اسلامي امارت د عامې روغتیا وزارت ژمن دی، چې د هېواد په ټولو نېږدې او لرې پرتو سیمو کې معیاري، عادلانه روغتیايي خدمتونه وړاندې کړي، د روغتیايي برخې ترڅنګ په چټکۍ سره په نورو برخو کې سترې سترې پروژې پرانیستل شوي دي او دا له دې ولس سره د اسلامي امارت ژمنتیا ده او وروسته له ډېره وخت څخه افغانستان خپل اصلي ساتونکی او مالک پیدا کړی دی.)

دغه روغتون شل بسترونه لري او د عمومي جراحي، عصبي جراحي، ارتوپېډي، راډيولوژي، لابراتوار او د مور او ماشوم اړوند روغتیايي خدمتونه په کې ترسره کېږي.