د جوزجان ولایت په قرقین ولسوالۍ دینار سیمه کې یو روغتیایي مرکز جوړ شو
د افغانستان اسلامي امارت د عامې روغتیا وزارت له لوري د جوزجان ولایت قرقین ولسوالۍ دینار سیمه کې د (۲۸) میليونه افغانيو په لګښت د یو روغتیايي مرکز ودانۍ جوړه او ګټې اخيستنې ته وسپارل شو.
په همدې موخه جوړه شوې غونډه کې د عامې روغتیا وزارت د مالي او اداري چارو مرستیال ښاغلي، مولوي محمد اسحاق صاحب زاده، د جوزجان عامې روغتيا رئیس قاري ذبیح الله حسیني، مسئولینو،علماء کرامو او قومي مشرانو ګډون کړی و.
یادې غونډې ته د وینا پرمهال د عامې روغتیا وزارت د مالي او اداري چارو مرستیال مولوي محمد اسحاق صاحبزاده وویل: دغه روغتیايي مرکز (CHC) د ۲۸ میليونه افغانيو په لګښت د شاخوا ۱۶ زره کورنيو روغتیايي اړتیاوو پوره کولو په ظرفیت جوړ او ګټې اخیستنې ته وسپارل شو.
ښاغلي محمد اسحاق صاحبزاده په خپلو خبرو کې د قرقین ولسوالۍ اوسیدونکو لپاره ددغه روغتیايي مرکز جوړېدل ستره لاسته راوړنه وبلله او هم یې د نورو روغتیايي اسانتیاوو برابرېدو ډاډ ورکړ.
