د داخل بستر شدیدې خوارځواکۍ د مدیریت شپږ ورځنی روزنیز پروګرام پای ته ورسېد
د عامې روغتیا وزارت د عامه تغذیې ریاست له لوري د « داخل بستر شدیدې خوارځواکۍ مدیریت» تر سرلیک لاندې شپږ ورځنی روزنیز پروګرام د روغتونونو د تغذیې برخې متخصصینو او ډاکترانو د ظرفیت لوړونې په موخه پای ته ورسېد
دغه پروګرام د مرکز کابل، پنجشیر، پکتیکا، غزني، کاپیسا او میدان وردګ ولایتونو ۳۰ تنه د ماشومانو ناروغیو متخصصینو او ډاکترانو لپاره د روغتیا نړیوال سازمان او OCHA/AHF په مالي ملاتړ جوړ شوی و.
د یاد پروګرام په پای کې، د عامې روغتیا وزارت د عامه تغذیې رئیس، ډاکټر حکمت الله معصومي د همکارو بنسټونو له ملاتړ او د ګډونوالو له هڅو مننه وکړه او ویې ویل: د دې ډول روزنیزو پروګرامونو ترسره کول په روغتونونو کې د تغذیې خدمتونو او خوارځواکۍ درملنې په اغېزمنتیا کې مهم رول لري او زیاته یې کړه، عامې روغتیا وزارت په راتلونکي کې هم د ورته پروګرامونو دوام ته ژمن دی.
د یادونې وړ ده، چې د یاد شپږ ورځني پروکرام په بهیر کې ګډونوالو ته د تغذیې خدمتونو د اغېزمنتیا، داخل بستر ناروغانو ته د پاملرنې، د خوارځواکۍ واحدونو (TFU) مدیریت، د خوړو د کیفیت کنټرول او د راپور ورکولو سیستم په اړه نظري او عملي زدهکړې ورکړل شوې.
