د روغتیايي خدمتونو د مدغم کولو نوې طرحه وڅېړل شوه
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي د BPHS او EPHS پروګرامونو په جوړښت کې د روغتیايي خدمتونو د یو ځای کولو نوې طرحې کتنې او بحث په موخه ناسته ترسره کړه
په دې ناسته کې د روغتیايي پراختیا او پالیسۍ مرستیال وویل: «د روغتیايي خدمتونو د بستو منظم انسجام د روغتیايي نظام لپاره بنسټیز او حیاتي اهمیت لري.» نوموړي ټینګار وکړ، چې د مخنیوي ورته پروګرامونو هدفمند ادغام به روغتیايي خدمتونو ته د خلکو لاسرسی ښه او اسانه کړي، د اړتیاوو پر بنسټ به یې ځواب ویونکی کړي، د ناروغیو شدت به راکم او د عامه پوهاوي کچه به لوړه کړي او د ټول هېواد په کچه به د روغتیایي خدماتو کیفیت ته وده ورکړي.
د ناستې پر دوام د پالیسي او پلان تخنیکي مشاور، ډاکټر هدایت الله حمیدي د روغتیايي خدمتونو د مدغم کېدو بستې نوې طرحه ګډونوالو ته تشریح کړه، چې وروسته ګډونوالو د طرحې د پیاوړتیا او مؤثر تطبیق په اړه خپل تخنیکي نظریات، وړاندیزونه او لیدلوري شریک کړل.
په پای کې، د روغتیایي خدمتونو د مدغم کېدو برنامې د لا ښه تدوین او تطبیق لپاره مشخص تخنیکي وړاندیزونه وړاندې شول او پرېکړه وشوه، چې د متخصصینو د تخنیکي کمېټې او همکارو بنسټونو له نورو مشورو وروسته به وروستی سند بشپړ او د پلي کېدو پړاو ته به وړاندې شي.
