د روغتیايي خدمتونو وړاندې کولو مرستیال په پکتیکا ولایت کې د روغتیايي مرکزونه فعاليتونه و ارزول
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د یوه تخنیکي پلاوي په ملتيا پکتیکا ولایت ته د سفر په ترڅ کې د دغه ولایت له ولایتي روغتون او د مټاخان جامع، یوسف خېل اساسي او مِست فرعي روغتيايي مرکزونو او د خیرکوټ ولسوالۍ له روغتون څخه لیدنې وکړې.
ښاغلي مرستيال، د یادو روغتیايي مرکزونو بېلابېلې څانګې وکتلې، ستونزې یې په نښه او د حل په موخه یې اړوندو مسؤلینو او روغتیايي کارکوونکو ته لازمې سپارښتنې وکړې؛ څو د روغتیايي خدمتونو په وړاندې کولو کې د خنډ او ځنډ مخنيوی وشي.
هغه همداراز، په يادو روغتيایي مرکزونو کې د ناروغانو احوال واخيست، د هغوی ستونزې یې واورېدې او روغتیايي کارکوونکو ته یې سپارښتنه وکړه، چې له مراجعینو سره د غوره چلند ترڅنګ، د هغوی روغتیايي ستونزو ته پر وخت رسېدنه وکړي.
دغه لیدنې د روغتیايي خدمتونو ښه والي په موخه ترسره شوې او اړوندو مسؤلينو ته هم د شته ستونزو حل او د خدمتونو لا ښه والي په اړه لازمې سپارښتنې وشوې.
