د روغتیایي خدمتونو وړاندې کولو مرستیال د مرصوص نړیوالې پانګونې شرکت له مرستیال سره وکتل
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني په خپل کاري دفتر کې د مرصوص نړیوالې پانګونې شرکت له مرستیال، واصفي اکډنیز او مل پلاوي سره د افغانستان په روغتیايي برخه کې د پانګونې په موخه لیدنه ترسره کړه
په دې ناسته کې د مرصوص نړیوالې پانګونې شرکت پلاوی، په افغانستان کې د پانګونې لپاره د مناسب چاپېریال برابرولو او د روغتیا په برخه کې د هغو برخو مشخص کولو غوښتونکی شو، چې د افغانستان اوسېدونکي ورته زیاته اړتیا لري؛ څو وروسته یاد شرکت وکولای شي د مشخصو شویو برخو له مخې په افغانستان کې پانګونه وکړي.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د مرصوص نړیوال پانګونې شرکت څخه په افغانستان کې د پانګونې په موخه مننه وکړه او ډاډ یې ورکړ، چې د عامې روغتیا وزارت رهبري په دې برخه کې بشپړې همکارۍ ته ژمنه ده.
