د سترګو روغتیا ته د پاملرنې او د ړوندوالي د مخنیوي په اړه د عامې روغتیا وزارت غونډه ترسره شوه
د عامې روغتیا وزارت له لوري د سترګو د روغتیا د اهمیت، د سترګو ساتنې او د ړوندوالي مخنیوي په اړه د خلکو د عامه پوهاوي کچې لوړولو په موخه د سترګو د روغتیا په اړه د عامه پوهاوي غونډه ترسره شوه.
په دې غونډه کې د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، د مقام د دفتر لوی رئیس، شیخ محمد طاهر حلیم، د وزارت یو شمېر مرکزي رئیسانو، د روغتیا نړیوال سازمان استازو، د روغتیايي برخې مسؤلینو او د رسنیو استازو ګډون کړی و.
د روغتیايي خدمتونو وړاندې کولو مرستیال، ښاغلي مولوي عبدالولي حقاني په خپلو خبرو کې وویل، چې د سترګو روغتیا ته پاملرنه، د ړوندوالي کچې کموالی او مخنیوی د عامې روغتیا وزارت له لومړیتوبونو څخه دی او په هېواد کې د سترګو د تخصصي روغتیايي خدمتونو د پراختیا لپاره هڅې روانې دي.
همدارنګه، د عامې روغتیا وزارت د مقام د دفتر لوی رئیس، شیخ محمد طاهر حلیم د اسلام له نظره د سترګو د اهمیت او ارزښت په اړه هر اړخیزې وينا ترسره او ویې ویل: چې د سترګو د ساتنې او سمې کارونې په برخه کې باید له بشپړ احتیاط څخه کار واخیستل شي؛ څو د الله تعالی دا ستر نعمت روغ او سالم پاتې شي.
ورته مهال، د سترګو د روغتیايي پاملرنې د همغږۍ آمر، ډاکټر آغا محمد عابد طوطاخیل، د یاد آمریت د فعالیتونو او لاسته راوړنو په اړه هر اړخیز معلومات وړاندې او ویې ویل، تمه ده چې تر ۲۰۳۰ میلادي کال پورې به په هېواد کې د سترګو د تراخوما ناروغي په بشپړ ډول له منځه ولاړه شي.
بل لور، د روغتیا نړیوال سازمان استازي، ډاکټر عتیقالله اکبري هم په ياده غونډه کې وینا ترسره او ویې ویل، چې لید یوازې د چاپېریال د لیدلو وسیله نه ده، بلکې د پرمختګ او باعزته ژوند بنسټ هم ګڼل کېږي.
