د سرطان ناروغۍ پر وړاندې د مبارزې نړیواله ورځ د یوې ناستې په ترڅ کې ونمانځل شوه
![از روز جهانی مبارزه با بیماری سرطان در نشستی گرامی داشت به عمل آورد](/sites/default/files/2022-02/30350a03-2e22-47db-acd2-59a6cf198993.jpg)
یکشنبه، سلواغه ۱۷/۱۴۰۰
د عامې روغتیا وزارت د سرطان ناروغۍ پر وړاندې د مبارزې نړیواله ورځ "د سرطان ناروغ د درملنې تشه ډکه کړئ" تر شعار لاندې د یوې غونډې په ترڅ کې ونمانځله.
د عامې روغتیا وزارت د پالیسۍ او پلان مرستیال ډاکتر محمد حسن غیاثي، د دغې ورځې په مناسبت د عامې روغتیا وزارت د سرپرست ډاکتر قلندر عباد وینا ولوستله او ویې ویل:
په نړۍ کې هر کال له ۴۴ میلیونو څخه زیات کسان د سرطان په ناروغۍ اخته کیږي، چې له دې جملې څخه شاوخوا ۱۰ میلیونه یې خپل ژوند له لاسه ورکوي، چې په افغانستان کې هر کال دا شمېر ۴۰ زرو ته رسېږي، چې له دې جملې څخه شاوخوا ۱۶ تر ۲۰ زرو پورې له همدې امله خپل ژوند له لاسه ورکوي.
د پالیسۍ او پلان مرستیال زیاته کړه، چې د عامې روغتیا وزارت په کابل، هرات او بلخ ولایتونو کې د سرطان د درملنې مرکزونه جوړول د روغتیايي کارکوونکي روزنه او د سرطان ناروغۍ په اړه د عامه پوهاوي کچه لوړول په هېواد کې د سرطان سره د مبارزې په برخه کې د دغه وزارت له لاسته راوړنو څخه وبلل.
له بلې خوا ډاکتر اختر محمد په افغانستان کې د روغتيا نړيوال سازمان په استازيتوب وويل: د سرطان نړيواله ورځ د ټولو لپاره يو ښه فرصت دى چې خپل ملاتړ څرګند کړي او په ګډه د سرطان پر وړاندې خپل غږ پورته کړي او جدي اقدام وکړي.
د يادونې وړ ده، چې په افغانستان کې د سرطان تر ټولوعام ډولونه د خولې او شونډو، د سينې، معدې، سږو او مرۍ دي، همدارنګه د سره شویو خوړو کارول، فزيکي فعاليت نه شتون، د تنباکو استعمال، د چاپیریال پاکوالی نه مراعتول او نا سالمه تغذیه هغه مسایل دي چې په ټولنه کې د سرطان په رامنځته کېدو کې مهم رول لوبوي.