د عامې روغتيا وزارت د خوړو او درملو معینیت کارکوونکو ته د مسلکي اخلاقو پیاوړتیا او د مراجعینو سره د غوره چلند په موخه "مراجعینو ته د درناوي" تر عنوان لاندې روزنیز سیمنار ترسره شو
په دې روزنیز سیمینار کې چې د عامې روغتيا وزارت د خوړو او درملو مرستیال ښاغلي مولوي حمدالله زاهد ، د مالي او اداري چارو مرستیال ښاغلي قاري عبدالولي صديقي، د مقام د دفتر لوی رئیس ښاغلي شيخ محمد طاهر حليم، د وزارت یو شمېر مرکزي رئیسانو، امرینو او د خوړو او درملو معینیت کارکوونکو ګډون کړی و.
د سیمینار پر مهال د مالي او اداري چارو مرستیال، ښاغلي قاري عبدالولي صدیقي وویل: ( دا زموږ ټولو شرعي وجيبه ده، چې خپلې اړوندې چارې په سمه توګه تر سره او له مراجعینو سره د ښه چلند سربېره د هغوۍ کارونو ته پر ټاکلي وخت رسېدنه وکړو).
همداراز، د عامې روغتيا وزارت د خوړو او درملو مرستيال، ښاغلي مولوي حمدالله زاهد مراجعينو سره د غوره چلند سربېره له ګډونوالو وغوښتل، چې خپلو چارو ته په سمه توګه رسېدنه تر سره او د وخت سالم مدیریت وکړي؛ تر څو د اړمنو هېوادوالو کارونه په ټاکلي وخت تر سره او ستونزو ته یې رسېدنه وشي.
دغه راز، د مقام د دفتر لوی رئیس، ښاغلي شيخ محمد طاهر حليم هم د اسلام مبارک دين له نظره د مراجعينو سره د غوره چلند په اړه هر اړخیزه وينا تر سره او د چارو په اسانتيا يې ټينګار وکړ.
په دې غونډه کې همداراز، د خوړو او درملو لوی رئیس ډاکټر نعيم الله ايوبي، د خوړو او درملو معینیت د ارشاد او دعوت آمر مولوي نجم الدين الفت او د ياد معینیت شکايتونو ته د رسېدنې مشاور مولوي عبدالرب حنيف هم مراجعينو سره د غوره چلند په اړه هر اړخيزې ويناوې تر سره کړي.
