د عامې روغتيا وزارت د روغتيايي خدمتونو وړاندې کولو مرستیال، ښاغلي مولوي عبدالولي حقاني په آريانا خصوصي روغتون کې د زړه ناروغیو په اړه د عامه پوهاوي غونډه کې ګډون وکړ
په دې غونډه کې د روغتيايي خدمتونو وړاندې کولو مرستیال د زړه ناروغیو په اړه د عامه پوهاوي غونډې جوړولو له امله د آريانا روغتون هڅې وستايلې او ورته غونډې يې د خلکو د عامه پوهاوي کچې لوړولو، د ناروغیو د پېښو کمښت او مخنیوي برخه کې مهمې وبللې.
نوموړي ټینګار وکړ، چې د زړه ناروغیو د مخنیوي برخه کې د سالم ژوندانه د تګلارې غوره کول، مناسب خوراک، منظم فزیکي فعالیت او پر وخت روغتیايي معاینات مهم رول لري او خلک باید د دغو ناروغیو د نښو په اړه لازم معلومات ولري.
