د عامې روغتيا وزارت د څارنې او پلټنې لوی ریاست له لوري د سرويلانس تر چتر لاندې د ساري ناروغيو لومړيتوب ټاکنې درې ورځنی ورکشاپ ترسره شو
دغه ورکشاپ چې د روغتیا نړیوال سازمان په مالي او تخنیکي همکارۍ ترسره شو، چې د پرانيستې پر مهال يې د څارنې او پلټنې لوی رئیس مفتي عبدالقدوس هاشمي، اړوندو مسؤلینو، د بېلابېلو ریاستونو استازو او روغتيا نړيوال سازمان تخنیکي متخصصینو ګډون کړی و.
په ياد ورکشاپ کې د شواهدو، په عامه روغتيا د ناروغیو د اغېزو، د خپرېدو خطر، د مخنیوي او کنټرول امکاناتو او د سرویلانس د اړتیاوو له مخې د ناروغيو د سرويلانس اوسنی نوملړ وارزول شو؛ څو په افغانستان کې د ناروغیو د څارنې لپاره روښانه، عملي او د شواهدو پر بنسټ لومړيتوبونه وټاکل شي.
د دې پروسې موخه دا ده، چې د افغانستان د ناروغیو سرویلانس سیستم لا اغېزمن، هدفمند او د هېواد له روغتیايي اړتیاوو او موجودو امکاناتو او منابعو سره سم تنظيم شي؛ ترڅو د ناروغیو پېژندنې، څارنې او پر وخت غبرګون برخه کې لا ښې پایلې ترلاسه شي.
