د عامې روغتیا وزارت د داخلي تفتیش رئیس، مولوي محمد سلیم حقاني او مل تخنیکي ټیم هلمند ته د سفر په ترڅ کې د یاد ولایت له والي مولوي امان الدین منصور سره لیدنه ترسره کړه
په دې لیدنه کې چې د هلمند د عامې روغتیا رئیس نقیب الله فاتح هم شتون درلود، د روغتیایي خدماتو پر ښه والي او د شته ستونزو حل په اړه خبرې وشوې، د هلمند والي ژمنه وکړه، چې ولایتي اداره به له مرکزي ادارې سره په ګډه د روغتیا برخې پیاوړتیا لپاره هلې ځلې کوي او زیاته یې کړه، چې د عامې روغتیا وزارت مسؤلینو دا ډول سفرونه د ستونزو د حل او اسانتیاوو رامنځته کېدو لپاره مهم دي.
د داخلي تفتیش رئیس وویل، د روغتیایي خدماتو ښه والي په موخه به هر راز ستونزې په ګډه حلوي او هڅه کوي چې د هلمند ولایت وضعیت ته په کتو روغتیا برخه کې د پام وړ بدلونونه راولي؛ تر څو خلکو ته لازمې اسانتیاوې رامنځته شي.
د یادونې وړ ده، چې د داخلي تفتیش رئیس او مل تخنیکي ټیم د هلمند عامې روغتیا ریاست څخه هم لیدنه ترسره او اړوندو مسؤلینو ته یې پر وخت د لازمو خدماتو وړاندې کولو سپارښتنه وکړه.
