د عامې روغتیا وزارت د راتلونکو پنځو کلونو ملي ستراتیژۍ د تهیه کولو په موخه د یاد وزارت له رئیسانو او د پروژو مسؤلینو سره ناسته ترسره کړه
یاده ناسته د عامې روغتیا وزارت د روغتیایي پراختیا او پالیسۍ مرستیال ښاغلي ډاکټر محمد حسن غیاثي په مشرۍ، د مقام د دفتر لوی رئیس شیخ محمد طاهر حلیم، مرکزي رئیسانو، د پروژو مسؤلینو او اقتصاد وزارت د استازو په شتون کې ترسره شوه.
دغه ناسته چې موخه د عامې روغتیا وزارت د ملي پروژو د تطبیق لپاره د راتلونکو پنځو کلونو ستراتیژۍ چمتو کول و. د روغتیایي پراختیا او پالیسۍ مرستیال له مرکزي رئیسانو او د پروژو مسؤلینو څخه وغوښتل، چې د خپلو اړوندو ادارو د پروژو ټول جزییات د هغه جدول په خانو کې ولیکي، چې ورلېږل کېږي او تر دوو ورځو پورې یې واستوي؛ ترڅو وروسته د اړینو اجرااتو لپاره د اقتصاد وزارت ته ولېږل شي.
له بل لورې، د عامې روغتیا وزارت مرکزي رئیسانو او د پروژو مسؤلینو ژمنه وکړه، چې د یادو اجرااتو لپاره به لازمې چارې ترسره کړي.
د یادونې وړ ده، چې د اقتصاد وزارت استازو د هغو جدولونو د ډکولو طریقه، چې ورته اړتیا وه، د یو پریزینټېشن له لارې ګډونوالو ته تشریح کړه.
