د عامې روغتیا وزارت د رهبرۍ په وړاندیز او د ریاست الوزراء عالي مقام د منظورۍ په اساس د روغتیا وزارت اړوند لاندې ټاکنې وشوې
د غزني ولایت د عامې روغتیا مخکینی رئیس ډاکټر محمد زرک ځیرک د لوګر د عامې روغتیا د رئیس په توګه، د لوګر ولایت د عامې روغتیا مخکینی رئیس حافظ سعید الرحمن قادري د میدان وردګ ولایت د عامې روغتیا رئیس په توګه او میدان وردګ ولایت د عامې روغتیا مخکینی رئیس ډاکټر رسول خان نظري د غزني ولایت د عامې روغتیا رئیس په توګه وټاکل شول.
په همدې موخه جوړو شویو مراسمو کې د عامې روغتیا وزارت د مقام د دفتر لوى رئيس، شیخ محمد طاهر حلیم او يو شمېر نورو مسؤلینو شتون درلود.
د عامې روغتیا وزارت د مقام د دفتر لوی رئيس تغير او تبديل د اسلامي نظام اصل وباله او زیاته یې کړه، د ا.ا.ا د عامې روغتیا وزارت ژمن دی چې کار اهل کار ته وسپاري، په چارو کې شفافیت راولي او د چارو د لا ښه تر سراوي په موخه ټاکنې تر سره کړي.
