د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د دې وزارت د جدې پاملرنو آمریت له مسؤلینو سره ناسته ترسره کړه
په همدې موخه جوړې شوې ناستې کې د عامې روغتیا وزارت د جدي پاملرنو (ICU) برخې آمر، ډاکټر جواد جهید او ورسره مل پلاوي د یو پرِزینټېشن په ترڅ کې د دغه ادارې دندې، فعالیتونه، موخې، راتلونکي پلانونه، وړاندیزونه، ستونزې او د حل لارې چارې بیان کړې او د عامې روغتیا وزارت له رهبرۍ یې وغوښتل، چې د دې آمریت ستونزو او ننګونو ته رسېدنه ترسره کړي.
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني د جدي پاملرنو آمریت فعالیتونه او وړاندیزونه واورېدل او د ستونزو د حل په موخه یې د لازمو اقداماتو ترسره کېدو ډاډ ورکړ.
د یادونې وړ ده، چې جدي پاملرنو آمریت د کابل، هرات، ننګرهار، کندز او پکتیا ولایتونو په روغتونونو کې د ناروغانو لپاره فعالیت کوي او پام کې ده، چې د روان کال په ترڅ کې دغه فعالیتونه د کندهار، بلخ، لوګر او یو شمېر نورو ولایتونو روغتونونو ته هم انتقال او د جدي پاملرنو څانګې (ICU) په کې پرانیستل شي
