د عامې روغتیا وزارت د نړیوالو اړیکو، مرستو د همغږۍ او انسجام رئیس مولوي محمد داود منصوري د بیل او ملینډا ګېټس بنسټ، UNFPA او د احصایې او معلوماتو ملي ادارې له مسؤلینو سره د همغږۍ ناسته ترسره کړه
د یادې ناستې موخه په کندهار او هلمند ولایتونو کې له پنځو کلونو څخه د کم عمر لرونکو ماشومانو د کورنۍ سروې پروژې په اړه همغږي او تخنیکي بحث و، چې په ترڅ کې یې د پروژې پر موخو، تخنیکي چوکاټ، جغرافیوي پوښښ او د پلي کېدو پر میکانېزمونو هر اړخیزې خبرې وشوې.
د دغې پروژې په اساس به له پنځو کلونو څخه د کم عمر لرونکو ماشومانو د روغتیا، تغذیې، مور او ماشوم ته د روغتیایي خدمتونو وړاندې کېدو، واکسیناسیون، د زیږون ثبت او اړوندو ټولنیزو شاخصونو په برخه کې کره او باوري معلومات راټولېږي؛ ترڅو د شواهدو پر بنسټ پالیسي جوړونه او د پروګرامونو پرېکړې لا پیاوړې شي.
همدارنګه، د پروژې د اغېزمن پلي کېدو په موخه به یوه ګډه کمېټه رامنځته شي، چې د تطبیقي پلان ترتیب، همغږۍ او څارنې مسئولیت به پر غاړه ولري او هره همکاره اداره به خپل ټاکل شوي فعالیتونه د خپلې کاري ساحې او تخنیکي مسؤلیتونو سره سم ترسره کوي.
د ناستې په پای کې پر ګډ کار، دوامداره همکارۍ او ژمنتیا ټینګار وشو؛ څو یاده پروژه په بریالیتوب سره تطبیق او ټاکلو موخو ته ورسېږي.
