د عامې روغتیا وزارت د نړیوالو اړیکو، مرستو د همغږۍ او انسجام ریاست او د UNHCR نړیوالې ادارې مسؤلینو ترمنځ د ۱۵ عمومي روغتیایي مرکزونو د سپارلو په موخه ناسته ترسره شوه

دغه روغتیایي مرکزونه، چې UNHCR نړیوالې ادارې له لوري جوړ شوي، روغتیا وزارت ته یې د سپارلو په اړه پر یو شمېر تخنیکي موضوعاتو بحث او خبرې تر سره شوې؛ له دې مرکزونه څخه به د ۱۱ روغتیایي مرکزونو لپاره د UNHCR ادارې له لوري طبي او غیر طبي تجهیزات هم تدارک کېږي.

د عامې روغتیا وزارت د نړیوالو اړیکو، مرستو د همغږۍ او انسجام رئیس مولوي محمد داوود منصوري د UNHCR ادارې له استازو څخه د مننې تر څنګ وویل، دغه مرکزونه د روغتیايي خدمتونو د پراختیا او ورته د عامو خلکو د لاسرسي ښه والي برخه کې یو مهم او اغېزناک ګام دی او ټینګار یې وکړ، چې یاد روغتیایي مرکزونه دې ژر تر ژره عامې روغتیا وزارت ته تسلیم او فعالیتونه دې پیل کړي؛ څو عام ولس ترې پر وخت لازمه ګټه واخلي.

نوموړي زیاته کړه، دغو روغتیایي مرکزونو ته دې معیاري تجهیزات وپېرل شي او هم دې په بشپړ دقت او پاملرنې د انتقال او نصب چارې ترسر شي؛ څو د خدماتو کیفیت تضمین شي.

ورته مهال، د UNHCR ادارې استازو د عامې روغتیا وزارت له اغېزمنې همغږۍ او همکارۍ څخه مننه وکړه او ویې ویل: موږ ټول ۲۰ روغتیایي مرکزونه جوړ کړي، چې له ډلې یې ۵ روغتیایي مرکزونه مخکې له مخکې روغتیا وزارت ته سپارل شوي او پاتې ۱۵ روغتیایي مرکزونه به په نږدې راتلونکي کې ورته وسپارل شي او د یادو مرکزونه له ډلې د ۱۱ روغتیایي مرکزونه څخه د هر یو مرکز لپاره د شاوخوا ۲۰۰،۰۰۰ امریکایي ډالرو په ارزښت طبي او غیر طبي تجهیزات هم برابر شوي دي.