د عامې روغتیا وزارت د ولایتونو د همغږۍ ریاست له لورې د کندهار، روزګان، نیمروز، هرات، هلمند، غور، بادغیس او فراه ولایتونو د عامې روغتیا له مسؤلینو سره انلاین ناسته ترسره شوه
په دغه انلاین ناسته کې د عامې روغتیا وزارت د ولایتونو د همغږۍ رئیس، ډاکټر فضل الهي "عليزی" اړوندو مسؤلینو او د ولایتونو د عامې روغتیا مسؤلینو ګډون کړی ؤ، چې په کې هېواد ته د بېرته راستنېدونکو هېوادوالو لپاره د غوره روغتیایي خدمتونو وړاندې کولو، د لا زیاتې همغږۍ، د خدماتو ښه والي، په ولایتونو کې د وړاندې کېدونکو خدماتو د راپور ورکولو، د ساري ناروغیو مخنیوي او د هغه لارښود په اړه بحث او خبرې وشوې، چې د عامې روغتیا وزارت له لوري د راستنېدونکو هېوادوالو لپاره د وړاندې کېدونکو خدماتو د مؤثریت او ښه والي په موخه جوړ شوی دی.
د ولایتونو د همغږۍ رئیس ولایتي مسؤلینو ته وویل، چې په منظم شکل باید په میاشت کې یو ځل انلاین ناسته د ولایتونو د همغږۍ ریاست سره وکړي، هغه ولایتونه چې راستنېدونکو هېوادوالو ورته زیات راځي، باید خپل اونیز راپور یاد ریاست سره شریک کړي او هغه لارښود چې د وزارت له لوري د خدماتو ښه والي په موخه جوړ شوی باید عملي کړي؛ ترڅو راستنېدونکو هېوادوالو ته اړین روغتیایي خدمات وړاندې شي.
همدا راز، د ولایتونو د عامې روغتیا مسؤلینو د خپلو فعالیتونو راپورونه د ولایتونو د همغږۍ له رئیس سره شریک کړل، چې د نوموړي له لوري ورته د لازیاتې پاملرنې او غوره روغتیایي خدمتونو وړاندې کولو په موخه لازمې سپارښتنې وشوې.
