د عامې روغتیا وزارت د څارنې او پلټنې لوی رئیس، ډاکټر عنایت الله عنایت او مل تخنیکي پلاوي بامیان ته د سفر په ترڅ کې د دغه ولایت د عامې روغتیا له رئیس، ډاکټر جواد حکیمي سره لیدنه ترسره کړه
په دې لیدنه کې د بامیان د عامې روغتیا رئیس، د وزارت څخه ورغلي پلاوي ته د ښه راغلاست ویلو تر څنګ د یاد ولایت د روغتیايي وضیعت، وروستیو لاسته راوړنو او پرمختګونو، شته ننګونو او راتلونکو پلانونو په اړه معلومات شریک او د عامې روغتیا وزارت له همېشني ملاتړ څخه یې خوښي وښوده.
دغه راز، د عامې روغتیا وزارت د څارنې او پلټنې لوی رئیس، ډاکټر عنایت الله عنایت د خپل سفر موخه شریکه او د روغتیايي وضیعت ښه والي په موخه یې د بامیان ولایت د عامې روغتیا ریاست کړنې وستایلې.
په دې لیدنه کې روغتیايي مرکزونو کې د ملي روغتیايي پروګرامونو د تطبیقي وضیعت، د وړاندې کېدونکو روغتیايي خدمتونو د څرنګوالي، طبي تجهیزاتو او روغتیايي کارکوونکو د وضیعت اړوند هم بحث او خبرې وشوې.
همداراز، د تطبیق کوونکې مؤسسې له مسؤلینو سره په ګډه د بامیان د مرکز اړوند شهیدان جامع روغتیايي مرکز له ټولو څانګو څخه لیدنه وشوه، د ناروغانو د ثبت راپورونه، د وړاندې کېدونکو خدمتونو بهیر، طبي تجهیزات او له ناروغانو سره د روغتیايي کارکوونکو چلند ارزیابي او د خدمتونو لا ښه والي په موخه یو شمېر وړاندیزونه د یاد مرکز له مسؤلینو سره شریک شول.
