د عامې روغتیا وزارت رهبرۍ د درملو داخلي تولیدوونکو فابریکو له مسؤولینو سره د همغږۍ ، ملاتړ، داخلي تولیداتو ته لومړیتوب ورکولو او د شته ستونزو حل په موخه ناسته تر سره کړه
په یاده ناسته کې چې د عامې روغتیا وزارت د خوړو او درملو مرستیال ښاغلي مولوي حمدالله زاهد، د مالي او اداري چارو مرستیال ښاغلي قاري عبدالولي صدیقي، د روغتیایي خدماتو وړاندې کولو مرستیال ښاغلي مولوي عبدالولي حقاني د روغتیایي پراختیا او پالیسۍ مرستیال دوکتور محمد حسن غیاثي او د تولیدي فابریکو مسؤلینو شتون درلود، چې د عامې روغتیا وزارت سره په لا ښې همغږۍ ، د نویو درملیزو اقلامو په تولید، د داخلي تولیداتو پرمټ د اړتیاوو پوره کولو او د روغتیایي خدماتو پر مهال داخلي تولیداتو ته په لمړیتوب ورکولو خبرې تر سره شوې.
د خوړو او درملو مرستیال، ښاغلي حمدالله زاهد د خپلو خبرو پر مهال د داخلي تولیداتو پر ارزښت وینا وکړه او ورسره یې د هر اړخیزې همکارۍ ډاډ ورکړ.
نوموړي همدارنګه په عاجلو حالاتو او الهي پیښو کې د تولیدي فابریکو له همکارۍ مننه وکړه او د لا ښې همغږۍ او عاجلو حالاتو کې د تیاري اړوند یې لازمې سپارښتنې وکړې.
د مجلس په جریان کې د روغتیایي خدماتو وړاندې کولو مرستیال ښاغلي عبدالولي حقاني داخلي تولیدات ارزښتمن وبلل او له تولیدي فابریکو یې مننه وکړه، چې په کور دننه یي پانګونه کړې. همدارنګه د مجلس په جریان کې د روغتیایي پراختیا او پالیسۍ مرستیال دوکتور محمد حسن تر څنګ د مالي او اداري چارو مرستیال، ښاغلي عدالولي صدیقي د داخلي تولیداتو اړوند خبرې وکړې او په وینا یې داخلي تولیداتو ته به د یو منظم میکانیزم له مخې لمړیتوب ورکوي.
د مجلس په پای کې د تولیدي فابریکو مسؤولینو خپلې غوښتنې او شته ستونزې له رهبرۍ سره شریکې کړې چې د رهبرۍ له لوري ورته د بشپړې همکارۍ ډاډ ورکړل شو.
