د عامې روغتیا وزارت سرپرست د روغتیا نړیوال سازمان د اجراییو بورډ په غونډه کې ګډون وکړ
چهارشنبه، غبرګولی ١٢/١٤٠٠
د عامې روغتیا وزارت سرپرست او د روغتیا نړیوال سازمان د اجراییوي بورډ مرستیال ډاکتر وحید مجروح، نن د دې سازمان د اجراییوي بورډ په غونډه کې ګډون وکړ.
په دې ناسته کې، د روغتیا نړیوال سازمان د ٧٤ کلنۍ ناستې د پایلو، مدیریت، د مالي چارو حکومتدارۍ، بودیجه او نورو مهمو مواردو په اړه بحث د نظرونو تبادله وشوه.
د عامې روغتیا وزارت سرپرست د روغتیا له نړیوال سازمان څخه د کادرونو په ګمارلو کې د مساواتو په نظر کې نیولو باندې ټینګار وکړ او زیاته یې کړه موږ هیله من یو چې په راتلونکي ځینې افغان کادرونه هم په دې سازمان کې وګمارل شي.
ډاکترمجروح، همدارنګه زیاته کړه هغه هېوادونه چې په عملأ په جګړه کې ښکېل دي د روغتیا نړیوال سازمان باید زیاته پاملرنه ورته وکړي ترڅو د اسانتیاوؤ په برابرلو کې یې تخنیکي ملاتړ وشي.
د عامې روغتیا وزارت سرپرست یادونه وکړه چې هغه به په دې سازمان کې د افغانستان او جنګ ځپلو هېوادونو فعاله استازی وي او په دې هېوادونو کې به د روغتیایي وضعیت د ښه کولو لپاره کار وکړي.
