د عامې روغتیا وزارت له لوري د لاسونو پاکوالي نړیواله ورځ د "پاک لاسونه ژوند ژغوري" تر شعار لاندې د یوې غونډې په ترڅ کې ونمانځل شوه
په همدې موخه جوړه شوې غونډه کې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د دې وزارت یو شمېر رئیسانو، د بېلا بېلو مرکزي روغتونونو رئيسانو، د روغتیا نړیوال سازمان استازو او روغتیا پالانو ګډون کړی و.
د عامې روغتیا وزارت د روغتیايي خدمتونو وړاندې کولو مرستیال، پاکوالی د ایمان برخه یاده کړه او د ساري ناروغیو د کنټرول او مخنیوي په برخه کې یې په صابون د لاسونو مینځل اړین وبلل.
د عامې روغتیا وزارت د روغتیايي خدمتونو وړاندې کولو مرستیال همداراز وویل، پاکوالي ته پاملرنه او په ځانګړي ډول د لاسونو مینځل ګڼې اسلامي، اقتصادي او طبي ګټي لري او په همدې موخه یې د لاسونو پاکوالي ته پاملرنه اړینه وبلله.
د یادې غونډې په دوام د عامې روغتیا وزارت د معالجوي طب رئیس، ډاکټر احمد سیر پاڅون وویل، لاسونه د ناروغیو په انتقال کې اړین رول لري او کولای شي د ناروغ کس څخه روغ کس ته د انتاني او کوویډ ۱۹ ناروغیو سربېره ګڼې نورې ساري او ویروسي ناروغۍ انتقال کړي، چې په همدې موخه یې پاکوالي ته پاملرنه اړینه ده.
نوموړي همداراز زیاته کړه، د لاسونو پاکوالي ته د پاملرنې په مرسته کولای شو د مړینو او ناروغیو کچه راکمه او د ساري ناروغیو د انتقال مخنیوی وکړو.
