د عامې روغتیا وزیر د افغانستان لپاره د بې پولې ډاکټرانو بنسټ له مسؤولینو سره لیدنه ترسره کړه
![MOPH](/sites/default/files/2024-08/whatsapp_image_2024-08-29_at_13.04.56_05da58aa.jpg)
د افغانستان اسلامي امارت د عامې روغتیا وزیر ښاغلي، مولوي نور جلال جلالي په خپل کاري دفتر کې د افغانستان لپاره د بې پولې ډاکټرانو بنسټ له مسؤولینو سره لیدنه ترسره کړه.
په دې لیدنه کې چې د افغانستان لپاره د بې پولې ډاکټرانو نوي مشر( میکایل لیپي) او پخواني مشر (فیلیپ روبریو) ګډون کړی و، په هېواد کې د بې پولې ډاکټرانو اړوند روغتیایي مرکزونو او روغتیايي خدمتونو ښه والي په اړه خبرې ترسره شوې.
د عامې روغتیا وزیر ښاغلي مولوي نورجلال جلالي د بې پولې ډاکټرانو نوي مشر ته د ښه راغلاست ویلو ترڅنګ روغتیایي سکتور سره د یادې ټولنې د مرستو لا پراختیا او همکاریو په ترسره کولو ټینګار وکړ.
د بې سرحده ډاکټرانو نوي مشر ښاغلي میکایل لیپي په افغانستان کې د روغتیايي خدمتونو د لاښه کېدو او دې برخې ته د پراختیا ورکولو ډاډ څرګند کړ.