د عامې روغتیا وزیر د WHO له مشر سره د نري رنځ د خدماتو د پیاوړتیا په اړه خبرې وکړې
د ا.ا.ا د عامې روغتيا وزير، ښاغلي مولوي نور جلال جلالي په خپل کاري دفتر کې افغانستان لپاره د روغتيا نړيوال سازمان له مشر، ښاغلي ايډوين سينيزا سلاوډور، د دې سازمان د مرکزي او سيمهييز دفتر د توبرکلوز (نري رنځ) برخې له مسؤلينو سره لیدنه تر سره کړه:
په دې لیدنه کې د توبرکلوز برخې د خدماتو د پياوړتيا، روغتيايي مرکزونو ته د نري رنځ په برخه کې د لا زياتو اسانتياوو برابرولو، ناروغانو ته د معياري او پر وخت خدماتو وړاندې کولو، د خدماتو د لا ښه والي لپاره د بودجې د زياتوالي، د تشخيص او درملنې د بهير د اغېزمنتيا او د روغتيايي کارکوونکو د ظرفيت لوړولو په اړه هر اړخيز بحثونه او خبرې تر سره شوې.
د عامې روغتيا وزير، ښاغلي مولوي نور جلال جلالي د روغتيا نړيوال سازمان له مشر او مل پلاوي څخه د دوامدارو همکاریو له کبله مننه وکړه او ويې ويل: (د نري رنځ ناروغۍ مخنيوی او درملنه د عامې روغتيا وزارت له لومړيتوبونو څخه ده او موږ هڅه کوو، چې د نړيوالو همکارو بنسټونو په ملاتړ، د هېواد ټولو اوسېدونکو ته معياري روغتيايي خدمات ورسول شي).
ښاغلي وزیر زياته کړه، د روغتيا نړيوال سازمان همکاري د روغتيايي نظام د پياوړتيا، د ناروغيو د کنټرول او د عامې روغتيا پروګرامونو د ښه والي لپاره خورا مهمه ده.
بل لور ته د روغتيا نړيوال سازمان مشر او د توبرکلوز برخې نړيوالو مسؤلينو خپلو دوامداره همکاریو ته په اشارې د نري رنځ ناروغۍ پر وړاندې د مبارزې، د خدماتو د پراختيا او د عامې روغتيا وزارت سره د بشپړې همکارۍ او پاملرنې ډاډ ورکړ.
