د عامې روغتیا وزیر په خپل کاري دفتر کې د عامې روغتیا وزارت د لومړیتوبونو، روغتیايي خدماتو معیاري کولو او د نړیوالو ادارو سره د غوره تعامل په موخه له اړوند مسؤلینو سره ناسته ترسره کړه
په دې ناسته کې چې د عامې روغتیا وزارت د مالي او اداري چارو مرستیال، ښاغلي مولوي محمد اسحق صاحبزاده هم شتون درلود د روغتیایي مرکزونو پر ارتقاء، روغتیايي کارکوونکو ته د معاشاتو پر تعادل او د لرې پرتو سیمو اوسېدونکو ته د روغتیايي خدماتو رسېدو اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د ټولو اړمنو هېوادوالو روغتیايي ستونزو ته د بشپړې رسېدنې او معیاري درملنې په موخه د روغتیايي خدمتونو معیاري کول، د روغتیايي سیستم پیاوړتیا او د نړیوالو ادارو سره غوره تعامل اړین وباله او له ټولو مسؤلینو یې وغوښتل، چې په دې برخو کې خپلې اړوندې چارې په سمه توګه پر مخ یوسي؛ ترڅو په کور دننه یو پیاوړی روغتیايي سیستم رامنځته او د ټولو ناروغو هېوادوالو ستونزو ته په سمه توګه رسېدنه ترسره شي.
