د عامې روغتیا وزیر په هند کې د چاپېریال او بهرنیو اړیکو له وزیر سره د روغتیايي همکاریو پر پیاوړتیا خبرې وکړې
د افغانستان اسلامي امارت د عامې روغتیا وزیر، ښاغلي مولوي نورجلال جلالي هند هیواد ته د خپل رسمي سفر په جریان کې د دې هیواد د چاپېریال، ځنګلونو او اقلیم بدلون وزارت او د دولت په چارو کې د بهرنیو اړیکو له وزیر کیرتي وردان سینګ سره لیدنه تر سره کړه:
په دې لیدنه کې په بیلا بیلو اړینو موضوعاتو ، چې موخه یې د روغتیا په برخه کې همکاري جلبول، ظرفیت لوړونه ، د درملو اوږدمهاله تأمین، او د روغتیا سکتور کې د پراختیایي همکاریو پیاوړتیا وه ، خبرې تر سره شوې.
ښاغلي وزیر مولوي نور جلال جلالي د خپلو خبرو په ترڅ کې وویل ، هڅه یې د روغتیا په برخه کې د هر اړخیزو اړیکو پیاوړتیا او د افغان علمي کادرونو د ظرفیت لوړونې لپاره د زمینې برابرول دي ، نوموړي همدارنګه په بیلا بیلو برخو کې د تجاربو شریکول اړین وګڼل او په وینا یې دا چاره به د چاپیریال په پاک ساتنې او د ناروغیو پر مخنیوي کې خورا اغیزمنه ثابته شي.
بل لور ته د هند د چاپېریال، ځنګلونو او اقلیم بدلون وزارت وزیر د خپلو خبرو په جریان کې د هر اړخیزې همکارۍ ډاډ څرګند کړ او و یې ویل د افغانستان د خلکو د روغتیایي امنیت د ملاتړ لپاره د هند ژمنتیا یو ځل بیا تازه کوو او په بیلا بیلو برخو کې به د افغان دولت سره همکاري جاري وساتي.
