د فراه ولایت د خاک سفید ولسوالۍ عمومي روغتون د جوړولو افر پرانیستې پروسه ترسره شوه
یاده پروسه د عامې روغتیا وزارت د تدارکاتو، مالي او پلان او پاليسۍ ریاستونو او د ۱۵ ودانیزو شرکتونو د استازو په شتون کې ترسره شوه.
په همدې موخه جوړې شوې ناسته کې د عامې روغتیا وزارت استازو وویل: (دا پروسه په بشپړه توګه شفافه ده او له هغه شرکت څخه چې بریالی کېږي، هیله لرو کارونه په دقیق او ټاکلي وخت د عامې روغتیا وزارت له شرطونو سره سم ترسره کړي؛ ځکه چې دا د عامه ګټو پروژه ده او موږ به یې له چارو څخه نظارت هم کوو).
بل لور، د ودانیزو شرکتونو استازو ژمنه وکړه، که په دې پروسه کې بریالي شي، د عامې روغتیا وزارت له معیارونو سره سم به د روغتون د جوړېدو چارې ترسره کوي.
د یادونې وړ ده، د عامې روغتیا وزارت د هېواد په ۳۱۸ ولسوالیو کې د عمومي روغتونو د جوړولو پلان لري، چې د یادې پروسې تدارکاتي چارې دوام لري.
