د لومړي ځل لپاره په افغانستان کې د پولیو (ګوزڼ) د تشخیص لابراتوار پرانیستل شو !

rasooli_admin
شنبه ۱۴۰۲/۱۱/۲۱ - ۱۳:۴۲
POLIO

په همدې موخه جوړو شوو مراسمو کې د عامې روغتیا وزیر، ښاغلي ډاکټر قلندر عباد، د عامې روغتيا وزارت د مالي او اداري چارو مرستيال، ښاغلي مولوي محمد اسحق صاحبزاده، د پولیو د له منځه وړلو ملي بېړني عملیاتي مرکز رئیس، الحاج ډاکټر عبدالقدوس بریالي، د ختیځې مدیترانې سیمې لپاره د روغتیا نړیوال سازمان د پولیو د برخې رئیس، ډاکټر حمید جعفري، د بېل ګېټس بنسټ او روغتیا نړیوال سازمان استازو ګډون کړی کړی و.

د عامې روغتیا وزیر، ښاغلي ډاکټر قلندر عباد د دغه لابراتوار د پرانیستې پر مهال وویل: « دا لومړی ځل دی چې په افغانستان کې د پولیو د تشخیص لابراتوار پرانیستل کېږي چې د پولیو ناروغۍ په ژر او کره تشخیص کې اړین رول لري او د دې لابراتوار پرانیسته د افغانستان اسلامي امارت د عامې روغتیا وزارت د پولیو د له منځه وړلو په برخه کې د جدیت ښکارندويي کوي.»

ښاغلي وزیر زیاته کړه، د عامې روغتیا وزارت د پولیو د له منځه وړلو په برخه کې جدي ګامونه اخیستي دي او زموږ موخه دا ده چې په ۲۰۲۴ زیږدیز کال افغانستان له پولیو څخه پاک کړو.

ښاغلي وزیر همداراز وویل، چې د افغانستان اسلامي امارت له واکمنېدو راپدېخوا د هېواد په روغتیايي سکټور کې د پام وړ بدلون راغلی، په ځانګړي ډول د ابتدايي، ثانوي او ثالثي روغتیايي خدمتونو په برخه کې او د پولیو پېښې د پخوا په پرتله کمې شوي دي او په دې برخه کې هڅې روانې دي.

ښاغلي وزیر همدارنګه زیاته کړه: « د لابراتوار د نتایجو په پایله کې موږ کولای شو کره پرېکړې وکړو او د پولیو په پروګرام کې لا نور اصلاحات رامنځته کړو.» 

د ختیځې مدیترانې سیمې لپاره د روغتیا نړیوال سازمان د پولیو د برخې رئیس، ډاکټر حمید جعفري د دې لابراتوار پرانیسته د پولیو د تشخیص او له منځه وړلو په برخه کې یوه ستره لاسته راوړڼه وګڼله او په راتلونکي کې د افغانستان د روغتیايي سکټور په برخه کې د لا زیاتې همکارۍ ډاډ څرګند کړ.

په پای کې د عامې روغتیا وزارت د مرکزي تشخیصیه لابراتوارونو رئیس، ډاکټر احمد ناصر حنفي وویل، د پولیو د تشخیص دغه لابراتوار د عامې روغتیا وزارت د مشرتابه په هڅو او د بهرنیو همکارانو په مرستې سره جوړ شوی چې وروسته له دې به په دې لابراتوار کې د پولیو د پېښو تشخیص کېږي.

په افغانستان کې د پولیو د تشخیص لابراتوار په لومړي ځل د بېل ګېټس بنسټ، روغتیا نړیوال سازمان او د پولیو د لابراتوارونو د نړیوالې شبکې په ملاتړ جوړ شوی دی چې نن ګټې اخیستنې ته وسپارل شو.

تازه خبرونه

چهارشنبه ۱۴۰۳/۵/۳ - ۱۵:۳۹
Background image

د عامې روغتیا وزیر د قطر هیواد د بهرنیو چارو له وزیرې سره وکتل

د عامې روغتیا وزیر، ښاغلي مولوي نور جلال جلالي قطر هېواد ته د سفر په ترڅ کې د یاد هېواد د بهرنیو چارو له وزیرې لوء لوء الخاطر سره وکتل

 په دې کتنه کې چې په قطر هېواد کې د اسلامي امارت. . .

چهارشنبه ۱۴۰۳/۵/۳ - ۱۳:۳۸
Background image

په تېره یوه میاشت کې د پنجشېر ولایت رُخه ولسوالۍ روغتون کې ۴۸ ستر عملیاتونه ترسره شوي!

د پنجشېر ولایت رُخه ولسوالۍ څلوېښت بستریز روغتون مسؤل، ډاکټر شمس الحق سروري وویل، د روان کال سرطان میاشت کې ۴۸ بېلا بېل ستر عملیاتونه د یاد روغتون د روغتیايي کارکوونکو له لوري ترسره شوي. . .

چهارشنبه ۱۴۰۳/۵/۳ - ۱۳:۱۷
Background image

د روغتیايي خدمتونو وړاندې کولو مرستیال د ځینو ولایتونو د عامې روغتیا له رئیسانو سره انلاین لیدنه تر سره کړه

د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د کندهار، هلمند او نیمروز ولایتونو د عامې روغتیا له رئیسانو سره انلاین لیدنه ترسره کړه

په دې. . .

BACK TO NEWS