د مالي او اداري چارو مرستیال د نړیوال تاجر ښاغلي الشیخ بن زاید بن سلطان سره ولیدل
د افغانستان اسلامې امارت د عامې روغتیا وزارت د مالي او اداري چارو مرستیال، الحاج مولوي محمد اسحق صاحبزاده په خپل کاري دفتر کې د نړیوال تاجر، ښاغلي الشیخ بن زاید بن سلطان النایان سره لیدنه ترسره کړه.
په دې لیدنه کې په روغتیايي برخه کې د یاد بنسټ د ونډې پر اخیستلو، په اوسني وخت کې د روغتونونو پر وضیعت او د جمهوریت روغتون د بیا رغونې په اړه بحث او خبرې ترسره شوې.
د عامې روغتیا وزارت د مالي او اداري چارو مرستیال، مولوي محمد اسحق صاحبزاده د یاد بنسټ له رئیس څخه د مننې ترڅنګ وویل، چې د عامې روغتیا وزارت ژمن دی؛ ترڅو ټولو ملي او بین اللملي پانګوالو او خیریه بنسټونو ته د پانګې اچونې لپاره زمینه برابره کړي.
له بل لوري ښاغلي، الشیخ بن زاید بن سلطان النایان بشر ته خدمت کول خپل لومړیتوب وباله او ویې ویل، چې په راتلونکې یوه میاشت کې به د دغه بنسټ له لوري د هرات ولایت د عامې روغتیا ریاست سره ۱۲۶۰۰۰ ډالرو په لګښت ۹ عرادې د Hemodialysis Machines او ۳ عرادې RO Machines مرسته وشي.
نوموړي همداراز د جمهوریت ملي او تخصصي روغتون لپاره د ځینو اړینو طبي تجهیزاتو د مرستې ډاډ هم ورکړ.
