د مجاز درملو د ملي لېست د بیاکتنې کمېټې نوبتي ناسته ترسره شوه
دا ناسته د عامې روغتیا وزارت د خوړو او درملو معینیت د کلینیکي ازموینو د تنظیم او کنټرول امریت له لوري د تخصصي روغتونونو د متخصصینو، د کابل طبي پوهنتون استازو، د فارمسي پوهنځي علمي کادر غړو او د خوړو او درملو معینیت د متخصصینو په شتون کې ترسره شوه.
په دې غونډه کې هغه ۱۶ ډوله درمل چې د خصوصي مؤسسو او شرکتونو له لوري د مجاز درملو په ملي لېست کې د شاملېدو لپاره وړاندیز شوي وو، د علمي شواهدو، تخنیکي معیارونو، د هېواد د روغتیايي نظام د اړتیاوو او نافذه لارښودونو پر بنسټ په هر اړخیزه توګه وارزول شول.
همدارنګه، د ترسره شویو ارزونو په پایله کې یو شمېر وړاندیز شوي درمل د علمي او تخنیکي معیارونو له پوره کولو سره سم د مجازو درملو په ملي لېست کې د شاملېدو وړ وپېژندل شول او د یو شمېر نورو درملو په اړه، د کافي علمي شواهدو او اسنادو د نشتوالي له امله پرېکړه وشوه، چې د هغوی ارزونه دې تر هغه وخته وځنډول شي؛ څو اړینې څېړنې يې بشپړې او لازم اسناد وړاندې شي.
