د پراختیايي پروژو برخه کې د مصرف شوې بودیجې د ارزونې په موخه ناسته ترسره شوه
د افغانستان اسلامي امارت د عامې روغتیا وزیر، ښاغلي مولوي نور جلال جلالي د روغتیایي پروژو له مسؤلینو سره د پراختیايي پروژو برخه کې د مصرف شوې بودیجې د ارزونې په موخه ناسته ترسره کړه
په دې ناسته کې د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، د مالي او اداري چارو مرستیال ښاغلي ملا بخت الرحمن شرافت، د روغتیايي پراختیا او پالیسۍ مرستیال ښاغلي ډاکټر محمد حسن غیاثي او د وزارت یو شمېر مرکزي رئیسانو شتون درلود.
د عامې روغتیا وزیر، ښاغلي مولوي نور جلال جلالي ناروغانو ته په معیاري توګه د روغتیايي خدماتو رسول د عامې روغتیا وزارت دنده وبلله او په همدې موخه یې د یاد وزارت لپاره د ځانګړې شوې بودیجې پر اغېزمن مصرف ټینګار وکړ.
ښاغلي وزیر همداراز د پراختیايي پروژو برخه کې د بودیجې اغېزمن مصرف، په دې برخه کې د چارو د لا چټکتیا او شته ستونزو د حل په موخه د مالي او اداري چارو مرستیال، ښاغلي ملا بخت الرحمن شرافت په مشرۍ یوه ځانګړې تخنیکي کمېټه، چې په راس کې یې د مقام د دفتر، بشري سرچینو، پلان او پالیسۍ، تدارکاتو او اداري ریاستونو او روغتیايي پروژو استازي شتون لري وټاکله او د روغتیايي پروژو مسؤلینو ته یې دنده وسپارله، چې د پراختیايي پروژو برخه کې دې د مصرف شوې بودیجې راپور چمتو او د ټاکل شوې کمېټې سره دې شریک کړي؛ څو د پاتې بودیجې د اغېزمن مصرف په برخه کې لازم تدابیر ونیول شي.
