د پکتیکا عامې روغتیا ریاست د معتادینو د بیاځلي ټولنیز ادغام لپاره ښوونیزه او مشورتي غونډه ترسره کړه
د پکتیکا ولایت د اورګون ولسوالۍ د ۳۰ بستریز معتادینو د درملنې روغتون کارکوونکو د داخل بستر ناروغانو لپاره د هغوی د بیاځلي ټولنیز ادغام په موخه یوه ښوونیزه او مشورتي غونډه ترسره کړه.
په دې غونډه کې ناروغانو ته د درملنې له بشپړېدو وروسته د سالم ژوند د غوره کولو، له نشهیي توکو څخه د لرې پاتې کېدو، د کورنۍ او ټولنې له غړو سره د ښو اړیکو د پیاوړتیا او د ټولنیزو مسؤلیتونو د ترسره کولو په اړه اړینې لارښوونې او معلومات وړاندې شول.
همداراز، ناروغان وهڅول شول چې د درملنې له بشپړېدو وروسته په مثبتو ټولنیزو فعالیتونو کې برخه واخلي، له ناسالمو ملګرو او نامناسب چاپېریال څخه ځان وساتي او د خپل ژوند د ښه والي لپاره له شته فرصتونو څخه ګټه پورته کړي.
