د کابل ولایت په بهارستان سیمه کې د درملو عمده پلورنځیو او درملتونونو څخه نظارت ترسره شو
د عامې روغتیا وزارت د خوړو او درملو معینیت د درملو، روغتیایي محصولاتو او خوراکي توکو د څارنې او پلټنې مسؤلینو له لوري د کابل ولایت په بهارستان سیمه کې د درملو عمده پلورنځیو او درملتونونو څخه د نرخونو د کنټرول، احتکار او انحصار مخنیوي، د کیفیت خوندیتوب او روغتیایي قوانینو د تطبیق په موخه نظارت ترسره شو، چې په ترڅ کې یې دوه درملتونونه د درملو لوړ قیمت پلور او روغتیایي قوانینو څخه د سرغړونې له امله وتړل شول.
د درملو، روغتیایي محصولاتو او خوراکي توکو د څارنې او پلټنې رئیس، ډاکټر محمد اقبال حماد وویل: (له هغې وروسته چې له پاکستان څخه د درملو واردول منع اعلان شول، په ځینو درملتونونو او عمده پلورنځیو کې په خپل سري ډول د درملو بیې لوړې او د درملو ځینو پلورونکو احتکار ته مخه کړې ده، نو په همدې اساس د څارنې او پلټنې مسؤلینو په منظم ډول نظارتونه پیل کړي دي؛ ترڅو هېوادوال درمل په عادلانه بیو او منل شوي کیفیت سره تر لاسه، نرخونو کنټرول او د احتکار مخه ونیول شي).
