عامې روغتیا وزارت د پولیو د له منځه وړلو نړیوال نوښت (GPEI) او د بهرنیو سازمانونو له استازو سره په تېره ربع کې د ترسره شویو خدماتو ارزونې او همغږۍ پیاوړتیا په موخه ناسته ترسره کړه
په دې ناسته کې چې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د نړیوالو اړیکو، مرستو د همغږۍ او انسجام رئیس مولوي محمد داود منصوري، یو شمېر نورو مسؤلینو، د بهرنیو سازمانونو او جي پي اي آی استازو ګډون کړی و، د اغېزمنې همغږۍ پیاوړتیا، د باکیفیته خدماتو پراختیا، د شته ستونزو حل، د GPEI او بهرنیو سازمانونو له لوري په تېره ربع کې د ترسره شویو خدماتو په اړه بحث او خبرې ترسره شوې.
د روغتیایي خدمتونو وړاندې کولو مرستیال د روغتیایي سیستم د پایښت لپاره د بېړنیو پروژو سربېره پر پراختیایي پروژو او سیستم جوړونه ټینګار وکړ او ویې ویل، اوسنیو شرایطو ته په کتو د سرچینو سالم مدیریت او د چارو لازم او اغېزمن ترسراوی ډېر اړین دی؛ څو خدمات لا ښه او اغېزمن شي.
