هلمند ولایت کې د یو پرمختللي روغتیايي مرکز د جوړېدو بنسټ ډبره کیښودل شوه
د هلمند ولایت په لښکرګاه ښار کې د درې سوه اتیا زره امریکایي ډالرو په ارزښت د یو پرمختللي روغتیايي مرکز د جوړېدو بنسټ ډبره د یو لړ مراسمو په ترڅ کې کېښودل شوه.
په همدې موخه جوړو شویو مراسمو کې د هلمند والي مولوي عبدالرحمن مسلم کندوزي، عامې روغتیا رییس ډاکتر سید احمد سعید، د بېلا بېلو ادارو مسؤلینو او د سیمې مشرانو ګډون کړی و.
د هلمند عامې روغتیا رییس ډاکتر سید احمد سعید د یاد روغتیايي مرکز جوړېدل د هلمند مېشتو او په ځانګړې توګه د لښکرګاه او شاوخوا سیمو خلکو د روغتیایي ستونزو حل لپاره اړین وباله.
هغه په یادو مراسمو کې زیاته کړه، چې دغه پرمختللی روغتیايي مرکز د کډوالۍ نړیوال سازمان په مالي همکارۍ د ۲۴ خونو او نورو اړینو ملحقاتو په درلودلو سره جوړېږي، چې چارې به یې د یولس میاشتو موده کې بشپړې شي.
