په اوو ولایتونو کې د واکسیناسیون په اړه د عامه پوهاوي غونډې ترسره شوې
د ننګرهار، خوست، پروان، پنجشیر، جوزجان، فراه او بادغیس ولایتونو د عامې روغتیا ریاستونو اړوند د کتلوي معافیت ملي پروګرام امریتونو له لوري «واکسینونه د هر نسل لپاره مؤثر دي» تر شعار لاندې د واکسیناسیون په اړه د عامه پوهاوي غونډې ترسره شوې.
په دې غونډو کې د یادو ولایتونو مسؤلینو د عامه پوهاوي، ناروغیو مخنیوي، واکسین تطبیق او په اړه يې د لا زیات پوهاوي رامنځته کولو برخو کې د علماوو، د جوماتونو د امامانو او رسنیو رول مهم وباله او له کورنیو څخه يې وغوښتل، چې خپل ماشومان واکسین کړي؛ ترڅو د ناروغیو پر وړاندې خوندي پاتې شي.
واکسین یو نړیوال پروګرام دی، چې له تېرو ۵۲ کلونو راهیسې يې په ټوله نړۍ کې نړیواله اوونۍ نمانځل کېږي، چې موخه يې د واکسین په اړه د عامه پوهاوي لوړول دي؛ ترڅو په راتلونکي کې یوه سالمه او صحتمنده ټولنه ولرو.
