په اکمال تخصص لوی ریاست کې د نوو رئیسانو د معرفي کولو مراسم ترسره شول
د ا.ا.ا د عامې روغتیا وزارت د رهبرۍ په وړاندیز او د ریاست الوزراء عالي مقام د منظورۍ په اساس ډاکټر احمد فرشيد محمدي د اکمال تخصص لوی ریاست د اکاډميکو چارو د انسجام د رئيس او ډاکټر محمد پرویز نوري د یاد رياست د عملیاتي رئيس په توګه اړوندو کارکوونکو ته وروپېژندل شول
په همدې موخه جوړو شویو مراسمو کې د عامې روغتیا وزارت د مالي او اداري چارو مرستیال ښاغلي ملا بخت الرحمن شرافت، د مقام د دفتر لوى رئيس شیخ الحدیث محمد طاهر حلیم، د اکمال تخصص رئیس ډاکټر نثار احمد نیازي او يو شمېر مرکزي رئيسانو ګډون درلود.
د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت په روغتيايې سيسټم کې پر لا زیات شفافيت ټينګار وکړ؛ نویو رئيسانو ته يې په چارو کې د برياليتوب هیله څرګنده کړه او اړوندو کارکوونکو ته یې وروپېژندل.
همدا راز، د مقام د دفتر لوی رئيس، شیخ الحدیث محمد طاهر حلیم تغير او تبديل د اسلامي نظام اصل وباله او زیاته یې کړه، د عامې روغتیا وزارت ژمن دی، چې کار اهل کار ته وسپاري.
