په ننګرهار ولایت کې د لسو نویو جوړو شویو روغتیایي ځالو پرانیسته تر سره شوه
د ا.ا.ا. د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي ننګرهار ولایت ته د سفر پر مهال دې ولایت کې د لسو نویو جوړو شویو روغتیايي ځالو پرانیسته ترسره کړه.
په همدې موخه جوړو شویو مراسمو کې د روغتیايي خدمتونو وړاندې کولو مرستیال، د وزارت یو شمېر مرکزي رئیسانو، د ننګرهار عامې روغتیا رئیس مولوي امین الله شریف، روغتیايي کارکوونکو او ځایي اوسېدونکو ګډون کړی و.
د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني په ننګرهار ولایت کې د یادو روغتیايي ځالو جوړېدل د یاد ولایت اوسېدونکو ته د ښه ژوند او هوساینې لپاره یوه مهمه لاسته راوړنه او د مور او ماشوم د روغتیا ښه والي په موخه یو اغېزمن ګام وباله.
ښاغلي حقاني وویل:” دغه روغتیايي ځالې د ملګرو ملتونو وګړو صندوق (UNFPA) په مالي همکارۍ د دې ولایت د لسو ولسوالیو په لرې پرتو سیمو کې جوړې شوي، چې په هرې یوې یې نږدې (۴۶۰۰۰ )زره امریکایي ډالر لګښت راغلی”.
ښاغلي حقاني دغه راز، په هېواد کې د روغتیايي خدمتونو پراختیا او ورته د خلکو د لا زیات لاس رسي ډاډ څرګند کړ.
