د هلمند ولایت روغتیايي مراکزو څخه ليدنه تر سره شوه
د عامې روغتیا وزارت د روغتیايي خدمتونو وړاندې کولو مرستيال ډاکټر حبیب الله آخندزاده د دغه ولایت له ولایتي روغتون او یو شمېر روغتیايي مرکزونو څخه لیدنه وکړه او په دغه ولایت کې یې د روغتیايي خدمتونو وړاندې کول له نږدې وڅیړل.
د عامې روغتيا وزارت مرستيال وويل، چې د دغه ولايت روغتيايي مرکزونو ته يې د سفر موخه د روغتيايي خدمتونو د وړاندې کولو ارزونه او د دغه ولايت د روغتيايي ننګونو حل کول دي.
ډاکتر آخندزاده په دغه ولايت کې د روغتيايي خدمتونو وړاندې کول د قناعت وړ وبلل او له روغتيايي کارکوونکو يې وغوښتل چې د روغتيايي خدمتونو د وړاندې کولو په برخه کې لا زيات کار وکړي.
نوموړي په دغه ولایت کې د روغتیايي خدمتونو د وړاندې کولو له مسوولینو سره هم وکتل او د هغوی د دندو ښه ترسره کولو په اړه سپارښتنې وکړې.
