د عامې روغتیا وزارت مرستیال د روغتیايي علومو انسټېټیوټ د نیالګیو کښېنولو کمپاین کې ګډون وکړ
د ا.ا.ا. د عامې روغتیا وزارت مالي او اداري چارو مرستیال، ملا بخت الرحمن شرافت د اکمال تخصص لوی رییس ډاکټر نثار احمد نیازي په ملتیا د پوهاند غضنفر روغتیايي علومو انسټېټیوټ له بېلابېلو برخو څخه لیدنه ترسره او هم یې په یاد انسټېټیوټ کې د “ یو روغتیايي کارکوونکی یو نیالګی “ تر شعار لاندې د نیالګیو کښېنولو کمپاین کې ګډون وکړ.
د مالي او اداري چارو مرستیال، ښاغلي ملا بخت الرحمن شرافت د انسټېټیوټ تر لیدنې وروسته د یاد انسټېټیوټ رییس ډاکټر محمد قاسم عادل سره د یوې ناستې پرمهال د چارو ښه والي په موخه لازمې سپارښتنې ترسره او د شریکو شویو غوښتنو پاملرنې ډاډ یې ورکړ.
ښاغلي مرستیال، دغه راز د یاد انسټیټوټ په انګړ کې د نیالګیو کښېنولو پرمهال له ټولو هېوادوالو په ځانګړې توګه له روغتیايي کارکوونکو وغوښتل، چې د نیالګیو کښېنولو په کمپاین کې برخه واخلي او د یو، یو نیالګي په کېنولو سره خپل چاپیریال پاک او د ناروغیو خپرېدو مخنیوی وکړي.
