د پولیو له منځه وړلو ملي بېړني عملیاتي مرکز رئیس، ډاکټر عبدالقدوس بریالي د پولیو له منځه وړلو لپاره د یونیسف نړیوالې ادارې له رئیس سره لیدنه وکړه
یاده لیدنه چې موخه یې په هېواد کې د پولیو له منځه وړلو ستراتېژیو پیاوړتیا ده، په کې ډاکټر عبدالقدوس بریالي د پولیو له منځه وړلو لپاره د یونیسف نړیوالې ادارې له رئیس، سټیون لاورییر سره د پولیو واکسین کمپاین کیفیت لوړولو لپاره پر مهمو ستراتېژیو، له پاکستان هېواد څخه راستنېدونکو ګډوالو ماشومانو ته د پولیو واکسین پر رسولو او د سرچینو اغېزناک مدیریت پر لارو چارو خبرې وکړې.
د پولیو له منځه وړلو ملي بېړني عملیاتي مرکز رئیس وویل، زموږ د بریا لپاره سیمه ییز تخصص ډېر مهم دی.
نوموړي دغه راز د ملګرو ملتونو له ادارو غوښتنه وکړه، چې له پولیو سره د مبارزې په برخه کې افغان مسلکي کادرونو ته لومړیتوب ورکړي، ترڅو هغوی ښه وروزل شي او د پولیو پر وړاندې مبارزه لا مؤثره شي.
