د عامې روغتیا وزارت د سترګو ناروغیو درملنې ګرځنده روغتیايي ټیمونو خبرتیا!
د هېواد په لرو پرتو سیمو کې د ړوندوالي کچې د راټیټولو په موخه د عامې روغتیا وزارت د سترګو د روغتیا ساتنې ګرځنده روغتیايي ټیمونه بې وزله خلکو ته په وړیا توګه د سترګو برخه کې روغتیايي خدمات وړاندې کوي، چې دا پروژه د افغانستان اسلامي امارت د پراختیايي بودیجې له لارې تمویلیږي.
په همدې اساس دغه اداره غواړي، چې نور د سترګو ناروغیو درملنې ملي روغتون په همکارۍ د ۰۷ /۰۲ / ۱۴۰۴ نېټې څخه تر ۱۴ / ۰۲/ ۱۴۰۴ نېټې پورې خپل ګرځنده روغتیايي ټیمونه چې په اړینو طبي وسایلو او درملو سمبال دي، تورخم ته واستوي؛ ترڅو ۱۰۰ تنو ته د سترګو د کترکت پردې عملیاتونه او د درملو په برخه کې یو شمېر ناروغانو ته اړینې لارښوونې ترسره کړي.
هغه هېوادوال چې د تورخم بندر له لارې هېواد ته راستانه شوي او د سترګو روغتیايي ستونزې ولري، خبر ورکول کېږي، چې په پورته ذکر شوې نېټې مراجعه وکړي؛ څو د ګرځنده روغتیايي ټیمونو له لوري ورته په وړیا توګه روغتیايي خدمات وړاندې او درملنه یې وشي.
