د EMR سیسټم د پیاوړي کولو او پراختیا په موخه غونډه ترسره شوه

د عامې روغتیا وزارت د څارنې او پلټنې لوی رئیس، ډاکټر عنایت الله عنایت په مشرۍ د روغتیایي معلوماتو د الکترونیکي ثبت سیسټم (EMR) د پیاوړي کولو او پراختیا په موخه تخنیکي غونډه ترسره شوه، چې په کې د وزارت د معلوماتي ټکنالوژۍ رئیس انجینر احمد جاوید وفا، د روغتیایي معلوماتو مدیریت سیسټم (HMIS) تخنیکي کارکوونکو او یو شمېر نورو متخصصینو ګډون کړی و

یاده غونډه چې د څارنې او پلټنې ریاست په کاري دفتر کې جوړه شوې وه، په کې د EMR سیسټم د غوره تطبیق، د دې سیسټم د پیاوړي کولو، پراختیا او پایدار تخنیکي چوکاټ د جوړولو په موخه مهمې طرحې او وړاندیزونه شریک شول. څارنې او پلټنې لوی رئیس، ډاکټر عنایت‌الله عنایت د یاد سیسټم د تطبیق پر ارزښت ټینګار وکړ او د معلوماتي ټکنالوژۍ ریاست او HMIS له تخنیکي همکارانو یې وغوښتل، چې د دې سیسټم د پیاوړي کولو په موخه لازم اقدامات پیل کړي.