ننګرهار ولایت کې د دولتي روغتيايي علومو انسټيټيوټ له نیمه طبي زده کړو څخه د ۲۵۰ تنه فارغانو د فراغت مراسم د یوې غونډې په ترڅ کې تر سره شول!
د يادې فراغت غونډې پر مهال د ننګرهار مرستيال والي مولوي عزيزالله مصطفی ، د ننګرهار د عامې روغتیا رئیس مولوي امین الله شریف او د بیلا بیلو امارتي ادارو استازو او ګڼو میلمنو ګډون کړی وو.
ښاغلي مرستیال والي د خپلې وینا پر مهال فارغانو او د هغوۍ د کورنيو غړو ته مبارکي وويله او فارغ شویو ځوانانو ته يې له نظري زده کړو وروسته په عملي روزنه کې د همکارۍ ډاډ ورکړ ،نوموړي پر ټولو ځوانانو غږ وکړ چې هر یو زده کړې وکړي، تر څو خپل هېواد ته د خدمت جوګه شي.
د ننګرهار د عامې روغتيا رئيس مولوي آمين الله شريف د خپلې وینا په ترڅ کې وويل، پر تاسو د بيت المال څخه لګښت شوی او بايد خپلو خلکو ته صادقانه خدمت وکړئ ، نوموړي هيله وښوده چې په راتلونکي کې به د نویو روغتیا پالانو په فراغت او په غوره ډول ظرفيت لوړونې سره هېوادوال د ګاونډيو هېوادونو له احتياج څخه خلاص شي.
د ننګرهار روغتيايي علومو انيسټيټيوټ آمر ډاکټر خالد شېرزاد د خپلې وینا پر مهال وویل: په ۳۸مه دوره کې يې ۲۵۰ تنه د نرسنګ، درملو جوړولو، طبي ټکنالوژۍ، غاښونو پروتيز او فزيوتراپۍ په برخو کې تر روزنې وروسته خدمت ته چمتو او دا دی نن یې د فراغت مراسم تر سره کیږي.
