د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ته د سفر په ترڅ کې د بي بي فاطمةالزهراء ولایتي روغتون څخه لیدنه وکړه
د دې سفر اصلي موخه چې د کونړ، لغمان او نورستان ولایتونو د زلزله ځپلو هېوادوالو روغتیايي ستونزو ته رسېدنه وه، ترڅ کې یې د روغتیايي خدمتونو وړاندې کولو مرستیال د کورنیو او بهرنیو روغتیايي مسؤلینو سره د لیدنې تر څنګ د دې ولایت د مرکزي او سیمه ییزو روغتونونو څخه هم لیدنه وکړه.
د روغتیايي خدمتونو وړاندې کولو مرستیال ټینګار وکړ، چې روغتیايي کارکوونکي باید د زلزله ځپلو خلکو سره د مرستې لپاره خپل روغتیايي او ایماني مسؤلیتونه په غوره توګه ترسره کړي، د ناروغانو په وړاندې له صبر او زغم څخه کار واخلي او روغتیايي خدمات په ښه توګه وړاندې کړي.
ښاغلي مرستیال همداراز، له روغتیايي کارکوونکو څخه د نه ستړي کېدونکو خدمتونو وړاندې کولو په موخه مننه وکړه، د هغوی هڅې یې وستایلې او ترې ویې وغوښتل، چې په دې سختو ورځو کې له خپلو هېوادوالو سره خواخوږي وکړي او د هر ډول روغتیايي مرستو په وړاندې کولو کې درېغ ونه کړي.
